Asalamualaikum wr wb. Selamat dino riyoyo dulur. Mohon maaf lair batin.
Mumpung suasanane mendukung soale sik bulan Syawal. Kepekso tak tulis
ide tulisan iki nganggo basa jawa (jawa timuran dulur) gawe nguri-uri
basa jawa. Tapi nuwun sewu nek pancen elek sebab pancen duduk pakar boso
Jowo. Tapi ingsun yakin masio duduk pakar, gak masalah sing penting
maknane iso dipangerteni.
Opo sing tak tulis iki yoiku soal piye
carane awake dhewe oleh Daya Kasekten. Akeh dulur-dulur sing durung
weruh soal iki. Akeh-akehe wong-wong sing wis ngamalno dzikir/wirid
nanging dianggep durung manjing lan durung mlebu nang awake. Email-email
pitakonan soko sedulur KWA akeh sing tak tompo takon bab iki. Nah,
ingsung arep njelasno setitik mugo-mogo onok manfaate.
Prinsipe
ngene. Amalan dzikir/wirid iku gak onok sing elek. Apik kabeh. Gak mek
wocoan wirid’e tok, Jelas nek dingerteni maknane mesti tambah apik. Tapi
nek gak weruh maknane, gak masalah. Sing penting niate apik. Yakin ae
nek sakjane kabeh amalan/ngelmu sing onok nang donya iki apik. Sing elek
iku wong nek sing ngamalno ngelmu tapi digawe tujuan elek.
Onok
pitutur Jowo ngene. Ngelmu iku kalakone kanthi Laku. Tegese ngelmu iku
iso manjing nang awak nek diamalno nang kelakuan bendino. Artine awake
dhewe kudu yakin sak yakin-yakine, keyakinan satus persen, nek iso sewu
persen nek opo sing diwirid iku duwe daya kekuatan alias karomah. Mari
ngono awake dhewe kudu tetep ngamalno bendino (basa arab’e istiqomah)
atine tetep sabar lego ilo ikhlas opo ae sing kedadean sek suwene
ngamalno ngelmu.
Biasane wong dadi males ngamalno maneh wocoan
wirid dzikir nek opo sing diniatno lan dikarepno gak kedaden. Ngene iki
jenenge mutung lan gak oleh dilakoni wong sing kepengen oleh karomah.
Padahal nek gak kedaden iku jenenge cobane wong duwe ngelmu. Ngene iki
berarti karepe awake dhewe durung selaras karo karepe Gusti Allah SWT.
Pitakone saiki: Yek opo carane ben karepe awake dhewe selaras karo
karepe Gusti?
Dulur-dulur KWA sing wicaksono…
Gusti Allah
iku duduk pelayan toko. Awake dhewe njaluk, langsung dilungi barang nek
syarate dicukupi yoiku nggowo duwit. Gusti Allah gak koyok ngene iki.
Gusti Allah iku Tuhan Semesta Alam. Menungso koyo awake dhewe iki gak
oleh merintah Gusti Allah. Opo tumon Gusti Allah gelem diperintah
menungso? Opo ngene iki jenenge sopan? Nek awake dhewe iku berdoa iku
kan artine awake dhewe njaluk sesuatu, nah nek njaluk jelas ono tata
krama/etikane. Makane awake dhewe iki kudu duwe kaca pangilon. Ngilo opo
kelakuane awake dhewe iki wis apik sesuai sing dikarepno Gusti Allah.
Sedino
awake dhewe mangan ping telu. Deloken opo sing dipangan awake dhewe iki
halal opo haram. Nek sing dipangan iku halal, teltien maneh soko endi
duwit sing digawe tuku panganan iku mau duwit halal. Goleke nganggo
kringete kerjo sing bener. Duduk duwit riba utowo duwit anakan. Olehe yo
duduk teko judi togel lan sak teruse.
Nek sing dipangan iku
panganan sing halal, sumbere yo halal gak ono unsur penipuan, teko
sumber sing jelas, berarti panganan iku mau resik. Oleh dipangan. Tapi
walikane, nek panganan iku soko sumber sing elek berarti panganan iku
termasuk haram. Ngene iki jenenge pemahaman hakekat jarene kaum sufi.
Terus
kelakuan kudu ditoto sing migunani marang liyane, menungso sak
podo-podo. Sodakoho sing akeh tapi sing ikhlas. Sodakoh iku wujude akeh.
Sodakoh pikiran, sodakoh tenogo, sodakoh duwit, lan liya-liyane.
Sing
paling utama prinsipe keyakinan wong muslim yoiku rukun iman. Iki
syarat wajib sing kudu diyakini. Iman artine keyakinan nang njero ati,
diomongno nang cangkem, diamalno nang lekakuan bendino, nambahi ketaatan
soko perintahe Gusti Allah karo ngadohi maksiyat. Iman iku iso mudun
iso munggah. Rukun iman sing kaping siji yoiku iman nek Allah iku
gustine menungso, ora ono sembahan liyo kejobo Allah, jeneng lan sifate
Allah kudu diyakini bener. Kaping loro, iman anane malaikat sing
kewajibane nggowo perintahe Gusti Allah kanggo menungso. Nomor telu,
iman nek kitab-kitab e Allah iku sejatine sabdane Gusti Allah, duduk
gaweane (makhluke) Gusti Allah. Kaum muslim kudu wajib yakin nek
Al-Qur`an iku kitab terakhir sing nyempurnakno kitab-kitab sing mudun
sakdurunge.
Nomor papat, iman marang para rosul. Gusti Allah
ngongkon poro rosul iku kanggo petunjuke menungso ben uripe gak
keblinger lan sesat. Nomor limo, iman marang dino piwalesan. Sak
rampunge urip nang alam dunyo iki, menungso mlebu alam barzakh lan
arwahe menungso nunggu dino kiamat. Iman nomor enem, menungso kudu yakin
Qada lan Qadar, yoiku takdir apik opo elek iku sejatine sumbere tetep
soko Gusti Allah taala.
Nek rukun iman iku wis dilakoni, rukun
islam ojo lali lakonono kanthi temenenan. Iku sejatine menungsu iku wis
duwe modal paling gede nggayuh urip sing jejeg lurus karo iradate Gusti
Allah. Sopo wonge isok nglakoni rukun iman lan rukun Islam, insya Allah
wonge oleh kebahagiaan sing sejati, lair batin dunya akhirat. Opo sing
dikarepno sesuai dengan opo sing dikarepno Gusti Allah. Kun Fayakun,
mugo-mugo sedulur kabeh iso nglakoni iki. Amin ya robbal alamin.
Alfatihah tak kirim kanggo sedulur sing moco tulisan iki. Nuwun. Rahayu
kang sami pinanggih. Wasaalamualaikum wr wb.
@KWA,2014
Home »Unlabelled » PIYE CARANE NGELMU ISO MANJING NANG AWAK
{ 0 komentar... Views All / Send Comment! }
Posting Komentar